Россиялик генерал-лейтенант Игор Кириллов ва унинг ёрдамчиси Иля Поликарповнинг Москвада содир этилган портлаш оқибатида ҳалок бўлиши юзасидан Ўзбекистон фуқароси Аҳмаджон Қурбоновга қасддан одам ўлдириш, террористик ҳаракат ва қурол сақлаш каби жиноят моддалари бўйича айблов қўйилди. Басманний судининг қарорига кўра, Қурбонов тергов давомида 2025 йил 17 февралгача қамоқда қолади.

Human Rights Watch (HRW) ташкилоти Исроилнинг Ғазо секторидаги фаластинлик аҳолини тоза сувдан маҳрум қилиши геноцид ва қирғин жиноятлари доирасида кўрилиши мумкинлигини таъкидлади. Ташкилотнинг ҳисоботига кўра, Ғазодаги фаластинликлар яшаб қолиш учун зарур бўлган минимал меъёр — кунига 15 литр сувдан ҳам маҳрум.

Исроил Ғазо секторида босқинчилик ва қирғинбарот урушини бошлаганига 441 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.

Россия президенти Владимир Путин 19 декабрь куни “Владимир Путин билан йил натижалари” дастурида Марказий Осиёдан келаётган мигрантлар учун талабларни кучайтириш зарурлигини таъкидлади. Унинг фикрича, мигрантлар Россияда яшаётган жойлари маданияти ва қонунларини ҳурмат қилишлари шарт.

Қозоғистон Сурияда собиқ ҳукумат кучларига қарши курашган “Ҳайъат Таҳрир аш-Шом” гуруҳини террорчилик ташкилотлари рўйхатига киритмаганини қайд этди. Бу ҳақда Қозоғистон Ташқи ишлар вазири ўринбосари Алибек Бақоев BES.media нашрига берган интервьюсида маълум қилди.

Грузия ҳукуматининг Европа Иттифоқига аъзо бўлиш бўйича музокараларни 2028 йилгача тўхтатиб қўйиш қарорига қарши намойишлар 22 кундан бери давом этмоқда. Намойишчилар кечаси яна пойтахт Тбилиси кўчаларига чиқиб, ҳукумат ҳаракатларидан норозилигини билдиришди.

Россияда мусулмон жамоаси учун шаръий кўпхотинлиликка оид янги фатво қабул қилинди. Россия Федерацияси Мусулмонлар диний бошқармасининг Уламолар кенгаши томонидан қабул қилинган ушбу ҳужжат, эркакларга муайян шартларга риоя қилган ҳолда тўрттагача хотин олиш имкониятини беради.

Марокашнинг Буузника шаҳрида Ғарбий ва Шарқий Ливия қонун чиқарувчи органлари вакиллари ўртасида музокаралар бошланди. Бу учрашув Ливияда 2014 йилдан бери давом этиб келаётган сиёсий бўлинишга чек қўйиш ва мамлакатни бирлаштириш мақсадида ўтказилмоқда. Ливия Муаммар Қаддафий режими ағдарилгандан кейин иккига бўлинган.

Исроиллик кўчманчилар Ливаннинг жанубий ҳудудларига бостириб кириб, Марун ар-Рас шаҳрида чодирлар қура бошлашди. Улар ижтимоий тармоқларда Ливан ҳудудида олинган суратлар ва селфиларни жойлаштириб, маҳаллий аҳоли ва халқаро ҳамжамият эътирозини келтириб чиқарди. Исроил кучлари нафақат чегара ҳудудларига, балки Ливан жанубидаги шаҳар ва қишлоқларга ҳам мунтазам зарар етказмоқда.

Баас режими ағдарилиши билан Сурияда қидирув ва қазиш ишлари фаол равишда давом этмоқда. Пойтахт Дамашқ ва жанубий Дараа шаҳрида бир нечта оммавий қабрлар аниқланди. Бағдод кўприги яқинида топилган оммавий қабрда турли қамоқхоналарда қийноқлар туфайли ҳалок бўлганлар кўмилгани маълум бўлди.