Туркияда “MazlumDer” – “Инсон ҳуқуқлари ва мазлумлар учун бирдамлик” уюшмасининг матбуот анжумани бўлиб ўтди. Унда ҳуқуқ фаоллари ва жамоат фаоллари иштирок этди. Анжуманда асосий эътибор Туркияда кенг муҳокама ва эътирозларга сабаб бўлаётган Алишер Турсунов (Мубашшир Аҳмад)нинг депортациясига қаратилди. Хусусан, “MazlumDer” ташкилоти вакили ушбу депортация жараёни суд қарори ва қонун талабларига зид ҳолда амалга оширилганини маълум қилди. У Туркия Иммиграция бошқармаси фаолияти борасида жиддий назорат текширув ўтказиш лозимлигини таъкидлади.

Теҳронда Хитой, Эрон, Туркия, Қозоғистон, Туркманистон ва Ўзбекистон вакиллари темир йўл орқали юк ташиш тарифларини мувофиқлаштириш бўйича келишувга эришди. Ушбу келишув Хитойдан Европагача бўлган юк оқимини Марказий Осиё ва Яқин Шарқ орқали оширишга қаратилган транспорт коридорини такомиллаштиришга хизмат қилади.

Туркияда бугунги кунга қадар 255 мингдан ортиқ Қуръон ҳофизлари диплом олган. Расман ҳужжат олмаганлар билан ҳисобланса бу рақам ярим миллионга яқинлашиши мумкин.

Ҳиндистон–Покистон можароси давом этаркан, мамлакат бош вазири Модига яқин бўлган нафақадаги генерал Гагандеп Бакши Туркияга қаратилган баёнотлар билан чиқди. YouTube’даги New India Junction канали орқали Туркияга очиқ таҳдид қилган Бакши Ҳиндистон ўзининг ядровий қудрати билан зарурат туғилса Туркияни парчалаб юбориши мумкинлигини таъкидлаган.

Ижтимоий тармоқларда Шавкат Мирзиёвга мурожаати билан машҳур бўлган Тошкентдаги "Омина" жоме масжидининг собиқ имом-хатиби Фазлиддин Парпиевнинг Истанбулда қўлга олингани ҳақидаги хабарлар тарқалди. Мазкур хабарларга аниқлик киритиш учун "Азон Глобал" жамоаси Парпиевнинг яқинлари билан боғланди.

Курдистон ишчи партияси (ПKK) қуролларни топшириш ва ташкилотни тарқатиб юбориш жараёнини бошлади. Ушбу қарор ташкилотнинг Туркиядаги қамоқда сақланаётган етакчиси Абдулла Ожаланнинг чақириқлари ортидан қабул қилинди.

Туркиянинг Бингўл вилоятида йўловчи автобуси ағдарилиб кетди. Ҳодиса Бингўл-Диярбакир йўлида, Генч туманига яқин ҳудудда содир бўлган. Сўнгги маълумотга кўра, ҳодиса оқибатида 5 киши ҳалок бўлган, 31 киши жароҳатланган.

Исроилнинг Моче Даян стратегик таҳлил маркази хулосасига кўра, Туркия Сурияда Усмонлилар даврига хос сиёсат юритмоқда ва мамлакатни қайта тиклаш ҳамда Сурия армиясини тайёрлашда етакчи ўринни эгаллаши мумкин.

Туркия Савдо вазирлиги Сурия бозорларидан товар ва маҳсулотлар олиб киришга қўйилган чекловларни олиб ташлади. Энди Сурия маҳсулотларини транзит орқали хорижий давлатларга экспорт қилиш учун Туркия ҳудудидан фойдаланиш имконияти яратилади.

2023 йил 6 февраль куни Туркиянинг Каҳраманмараш вилояти марказида 7,7 ва 7,6 магнитудали кучли зилзилалар содир бўлиб, мамлакат тарихидаги энг йирик табиий офатлардан бирига айланган эди. Зилзила оқибатида 53 537 киши ҳалок бўлди, 107 213 киши жароҳатланди.