Марказий Осиёда банклар Россия компанияларига рад жавобини бермоқда. Марказий Осиё банклари томонидан Россия компанияларига тўловларни амалга оширишдан бош тортиш ҳолатлари 30 фоизгача ошган. Шунингдек, Қозоғистон, Қирғизистон, Ўзбекистон ва Тожикистон билан тўловларни амалга ошириш муддатлари икки ҳафтага узайган. Муаммолар июнь ойида Москва биржаси ва бошқа рус компанияларига нисбатан АҚШ санкциялари жорий этилганидан кейин бошланган.

Германия қуролли кучлари бош инспектори генерал Карстен Бройер Россия йилига 1000-1500 та танк ишлаб чиқараётгани, Бундесверда эса 300 та танк қолганини маълум қилди. У разведка маълумотлари Россия армияси Ғарбга ҳужум қилишга ҳозирлик кўраётгани ҳамда 2029 йилга бориб буни амалга ошириш учун барча қурол-яроғ ва инсон ресурсларига эга бўлишини таъкидлади.

Британия Қуролли Кучлари қўмондони генерал Роланд Уокер келгуси уч йил ичида урушга тайёргарлик кўриш, 2027 йилгача британ армиясининг жанговар қобилиятини икки баробарга ошириш зарурлигини таъкидлади. Унинг фикрича, Россия, Эрон ва Хитой Британияга хавф туғдириши мумкин. “Уруш муқаррар эмас, аммо можарога тайёргарлик кўриш ва унинг олдини олиш учун вақт етарли”, деди қўмондон.

Россия Давлат Думаси депутати Сергей Каргинов меҳнат муҳожирларининг ноқонуний яшаш жойлари ҳақида хабар берган россияликларга 100 минг рубль миқдорида бонуслар тўлашни таклиф қилди. Депутат ўз таклифини муҳожирлар томонидан содир этилаётган жиноятлар тобора зўравонликка айланиб бораётгани билан изоҳлади. Айни пайтда мамлакатдаги меҳнат муҳожирлари сони охирги 10 йилдаги энг паст даражага тушган.

Россия судлари Украинадаги уруш бошланганидан буён 53 нафар фаол ва мухолифатчини мажбурий психиатрик даволанишга ҳукм қилди.

Россия Давлат Думаси депутати ва Оила масалалари қўмитаси раҳбари Нина Останина Украинадаги "махсус операция" Россияда туғилиш даражаси ва болали оилаларнинг ҳаёт сифатига салбий таъсир кўрсатаётганини маълум қилди. У 300 минг чақирилувчи ва шунча миқдордаги кўнгиллиларнинг ҳарбий ҳаракатларга жалб этилиши туғилиш даражасига салбий таъсир кўрсатишини таъкидлади. Қайд этилишича, 2024 йилнинг дастлабки беш ойида Россияда аҳоли сони 282 минг кишига камайган, бу – ўтган йилнинг шу даврига нисбатан 45 минг кишига кўпроқ дегани.

Эроннинг янги президенти Масуд Пезешкиан давлат раҳбари этиб сайланганидан кейин чоп этган мақоласида Россияни мамлакатининг қимматли стратегик иттифоқдоши деб атади. "Хитой ва Россия қийин пайтларда бизни доимо қўллаб-қувватлаб келган. Биз бу дўстликни чуқур қадрлаймиз”, – деди у.

Қозоғистон Қимматли қоғозлар марказий депозитарийси ўз мижозларидан 10 августгача Россия қимматли қоғозларини унинг ихтиёридан чиқариб олишни талаб қилди. Бунга АҚШ Ғазначилиги июнь ойида Москва биржаси ва Россия депозитарийсига қарши санкциялар киритгани сабаб қилиб кўрсатилди.

Россия қонунчилигига муҳожирларни мамлакатдан чиқариб юборишга сабаб бўладиган ҳуқуқбузарликлар рўйхатини кенгайтириш режалаштирилмоқда. Жумладан, ички ишлар ва бошқа ҳуқуқни муҳофаза қилиш органлари ходимларининг қонуний буйруқларига бўйсунмаслик, миграция рўйхатидан ўтишда ёлғон маълумотлар тақдим этиш ёки тақиқланган ташкилотлар рамзларини кўрсатиш ҳам депортга сабаб бўлиши мумкин.

Россия мусулмонлари диний бошқармаси раисининг биринчи ўринбосари, Москва ислом институти ректори, илоҳиёт фанлари доктори Дамир Мухетдинов ниқоб РФ туб мусулмон халқлари учун тарихий анъанавий либос эканини таъкидлаб, Совет Иттифоқидан олдинги даврда татарлар ва Шимолий Кавказ халқлари орасида бу кийим кенг тарқалгани бўйича тарихий далилларни мисол тариқасида келтирди.