Исроил Ғазо секторида босқинчилик ва қирғинбарот урушини бошлаганига 244 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.

Испания Жанубий Африканинг Ғазо секторидаги геноцид бўйича Халқаро судда Исроилга қарши даъвосига қўшилди. У Ғазо секторидаги геноцидни тўхтатиш учун зудлик билан чора кўришга чақирди.

Россия президенти Владимир Путин етакчи ахборот агентликлари раҳбарлари билан учрашувда Ғазодаги вазият ҳақида тўхталиб, у ерда бўлаётган воқеаларни уруш эмас, балки тинч аҳолининг бутунлай йўқ қилиниши деб атади. Шу билан бирга, Россия етакчиси ҲАМАСнинг ҳаракатларини қўпорувчилик сифатида баҳолади.

Ўзбекистон ТИВ АҚШ президенти Жо Байден эълон қилган Ғазо секторида ўт очишни тўхтатиш режасига муносабат билдирди. Унда Ўзбекистон можароларни фақат тинч йўл ва барча мавжуд дипломатик воситалар ёрдамида ҳал қилиш тарафдори экани таъкидланган. “АҚШнинг ўт очишни тўхтатиш, гаровга олинганларни озод қилиш ва тинч ҳаётни тиклаш бўйича ташаббусини олқишлаймиз», — деди вазирлик вакили.

Исроил ҳукумати Ливан билан фронтда юзага келиши мумкин бўлган кескинлашувга тайёргарлик кўриш учун қўшимча 50 минг захирадаги ҳарбий хизматчилар чақирувини маъқуллади. Фаол захирадаги аскарларнинг умумий сони шимолда Ливан билан эҳтимолий жангларга тайёргарлик кўриш учун 300 минг нафардан 350 минггача кўтарилди. Ливан билан чегарада Исроил ҳарбий кучлари сони ортиб бормоқда.

Мьянманинг Ракхайн штатидаги мусулмонлар дунёдаги энг кўп таъқиб қилинадиган ва камситиладиган гуруҳлардан бири бўлиб қолмоқда. Улар 2012 ва 2017 йилларда Мьянма ҳарбий хунтаси томонидан уюштирилган геноцид қурбони бўлиб, кейинчалик Бангладеш каби давлатларга зўравонликлардан қутулиш учун кетган қочқинлар сифатида халқаро диққат марказига айланди. 1,2 миллиондан ортиқ Роҳинжа мусулмонлари айни дамда Мьянмадан ташқарида истиқомат қилишади, бу эса уларни дунёдаги фуқаролиги мавжуд бўлмаган энг катта гуруҳлардан бирига айлантиради.

Columbia Law Review журнали сайти Исроилни танқид қилувчи мақола ортидан ўчириб қўйилди. Ҳарвард юридик факультети аспиранти фаластинлик Рабеа Эгбариянинг Исроилни геноцидда айблаб ёзилган мақоласи туфайли АҚШдаги 123 ёшли Columbia Law Review журнали сайти ёпиб қўйилди. Мақола муаллифи сайтнинг ёпилишини “АҚШдаги коллежлар кампусларида кузатилаётган кенг кўламли авторитар репрессиянинг кичик бир қисми” сифатида кўриш кераклигини таъкидлаган.

Грузия парламенти бир жинсли никоҳларни рўйхатдан ўтказиш, ўз жинсини ўзгартирган ёки ноанаънавий йўналишга эга шахсларга бола асраб олиш, жинсни ўзгартириш бўйича тиббий муолажаларни ўтказиш ва "ЛГБТ ташвиқоти" кабиларни тақиқлашни кўзда тутувчи қонун лойиҳасини кўриб чиқмоқда. Ҳужжатнинг узил-кесил кузда қабул қилиниши кутилмоқда.

Ҳиндистонда бўлиб ўтган парламент сайловларида миллатчилик сиёсатини юритаётган бош вазир Нарендра Модининг ҳукмрон Бҳаратия Жаната партияси парламентдаги кўпчилик ўринни йўқотди. Бу 2014 йилда ҳокимият тепасига келган Моди учун кутилмаган зарба бўлди. Эндиликда Моди ҳокимиятда қолиш учун коалициядаги ҳамкорлар билан музокара олиб боришга мажбур. Таҳлилчиларнинг фикрича, мамлакатда исломофобия ва миллатчилик кайфияти янада кучаяди.

Исроил Ғазо секторида босқинчилик ва қирғинбарот урушини бошлаганига 243 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.