Афғонистон адлия вазирлиги янги қонун чиқариб, тўйлардаги ортиқча урф-одат, маросим ва харажатларни тақиқлади. Ҳужжатда бу каби одатларнинг Исломга тўғри келмаслиги ҳамда турган-битгани исрофгарчиликдан иборатлиги айтилган. Ушбу тақиқ совчилик маросими, тўй олди ва тўйдан кейинги зиёфатлар, ҳашаматли дастурхонлар, тўёна, сеплар, унаштирув маросими, қимматбаҳо совғалар алмашишдан тортиб келиннинг куёвникига олиб келиши керак бўлган жиҳозларгача ўз ичига олади.