Россия Ички ишлар вазирлиги мамлакатда 630 мингга яқин ноқонуний муҳожир истиқомат қилишини маълум қилди. Уларнинг мамлакатни ихтиёрий равишда тарк этишлари учун 2025 йилда назорат қилинадиган шахсларнинг махсус реестри жорий этилади. Қайд этилишича, 2023 йилда РФда қонуний равишда бўлган меҳнат муҳожирлари сони 3,5 миллион кишидан ошмаган. Уларнинг аксарияти Ўзбекистон, Тожикистон ва Қирғизистон фуқароларидир.

Россия Савдо-саноат палатаси вице-президенти Елена Дибова НТВ телеканалига берган интервьюсида мамлакатдаги ҳарбий заводларда ишлайдиган одам йўқлигини таъкидлаб, хизмат кўрсатиш, жумладан, курьерлик ва таксичиликни тақиқлаб, ушбу соҳаларда ишлайдиганларни ҳарбий заводларга жўнатишни таклиф қилди.

ЛДПР депутатлари меҳнат муҳожирларига оилаларини Россияга кўчириб келишини тақиқлашни кўзда тутган қонун лойиҳасини ишлаб чиқмоқда. Давлат Думаси вакилининг фикрича, бу ишчи кучи етишмаслиги билан боғлиқ вазиятнинг янада ёмонлашувига олиб келади.

Меҳнат муҳожирларининг Россияни оммавий тарк этиши фонида иш берувчилар мигрантларнинг ойлик маошларини оширишга мажбур бўлмоқда. Бу эса, ўз навбатида, товар ва хизматлар таннархининг ошиши ҳамда сифатининг тушишига сабаб бўлмоқда - “Московский комсомолец” тадқиқоти.

Сўнгги пайтларда Россия компаниялари МДҲдан ташқари мамлакатлардан ишчиларни қидириш бўйича фаоллигини сезиларли даражада оширди. Деярли барчани ҳайратда қолдирган нарса – меҳнат захираларининг ҳатто Африкадан ҳам жалб қилингани! Бундан ташқари, ушбу жараён бир неча йил олдин бошланган ва фақат жадал ривожланмоқда.

Россия президенти Владимир Путин яқин йилларда мамлакатда ходимлар ва малака етишмаслиги муаммоси кузатилишини маълум қилди. У меҳнат бозорида яқинлашиб келаётган ходимлар танқислигини паст малакали муҳожирлар ҳисобидан қоплашни тақиқлади. "Бизга бошқа ёндашувлар керак", - деди Россия президенти.

Ўтказилган ижтимоий сўров натижаларига кўра, “Крокус Сити Холл”даги фожиадан сўнг россияликларнинг 55-60 фоизи меҳнат муҳожирларига нисбатан “аниқ салбий” фикрга келган. Саккиз ой муқаддат бу кўрсаткич 40 фоизни ташкил этганди.

Москвадаги қурилиш майдонида қурилиш материалларининг нотўғри тақсимоти сабабли Ўзбекистон ва Тожикистон фуқаролари оммавий муштлашди. Натижада 10 нафар ўзбекистонлик ва 13 нафар тожикистонлик меҳнат муҳожирлари қўлга олинди. Ҳодисада ҳеч ким жабрланмаган.

Қримда бир қатор соҳаларда чет эл фуқароларини ишга олишни тақиқлашга қарор қилди. Улар орасида транспорт, ишлаб чиқариш, IT, спорт ва дам олиш соҳалари мавжуд. Аввалроқ Новосибирск, Самара ва Ёқутистонда ҳам бир қатор соҳалар меҳнат муҳожирлари учун “ёпилган” эди.

Чет элдаги фуқаролар учун элчихоналарда 24 соатлик “колл-марказлар”, ишчи виза, йўл чиптаси, хорижий тил ва касб бўйича малакани баҳолатиш харажатлари қисман қоплаш, хорижий муҳожирликдан қайтган фуқаролар учун молиявий ёрдам ва бошқа таклифлар – Ўзбекистон президентига меҳнат муҳожирларини қўллаб-қувватлашга қаратилган таклифлар тақдимот қилинди.