PKK расман қурол ташлагани ва ўзини тарқатганини эълон қилди
2025 йил 12 май куни 40 йилдан ортиқ давом этган қуролли курашдан сўнг Курдистон Ишчилар партияси (PKK) ўзини ўз-ўзидан тугатиш ва қуролларни топшириш қарори қабул қилганини эълон қилди. Бу қарор Туркия билан тинчлик ташаббуси доирасида, шимолий Ироқда бўлиб ўтган партия қурултойида қабул қилинди.

PKK'га яқин манбалардан бири — Firat News Agency томонидан тарқатилган баёнотда “PKK ташкилоти тугатилди ва қуролли кураш якунланди”, дея маълум қилинди.

Бу тарихий қарор PKK етакчиси Абдуллоҳ Ўжаланнинг 2025 йил 27 февралда йўллаган чақириғидан сўнг амалга оширилди. Ўжалан 1999 йилдан буён Истанбул яқинидаги оролда қамоқда сақланмоқда ва у партияни тугатиш ҳамда қуролларни топшириш учун қурултой чақиришга даъват қилган эди. Шундан сўнг PKK 1 март куни бир томонлама ўт очишни тўхтатганини эълон қилди.

Қурултойда PKK'нинг тарихий миссияси якунлангани ва курд муаммосини эндиликда демократик сиёсий жараёнлар орқали ҳал қилиш мумкинлиги таъкидланди. Шунингдек, қуролли курашни давом эттириш энди зарур эмаслиги қайд этилди. Қуролларни топшириш жараёни Абдуллоҳ Ўжалан назоратида амалга оширилади.

Туркия ҳукумати ва халқаро ҳамжамият ушбу қарорни ижобий қадам сифатида баҳоламоқда. У мамлакатда тинчлик ва барқарорлик сари муҳим бурилиш нуқтаси бўлиши мумкин.

Эслатиб ўтамиз, PKK 1984 йилдан бери Туркияда қуролли ҳаракат олиб бориб, ўн минглаб инсонларнинг ҳаётига зомин бўлган. Туркия, АҚШ ва Европа Иттифоқи томонидан террорчи ташкилот деб эътироф этилган PKK'нинг бу қарори минтақавий тинчлик ва барқарорлик йўлида янги саҳифа очиши мумкин.

Мавзуга алоқадор

Энг кўп ўқилган

Тавсия қилинган