Малида россиялик ёлланма аскарлар ўлдирилди
Шимолий Африкада Ал-Қоида билан алоқадор бўлган "Жамоат ал-Ислом вал Муслимин" томонидан уюштирилган ҳужумда Россиянинг "Вагнер" хусусий ҳарбий компаниясидан камида етти нафар ёлланма аскар ҳалок бўлди. Бу ҳақда SITE Intelligence monitoring гуруҳи жума куни хабар берди.
Жангарилар қўлга киритган ўлжалар орасида қурол ва ўқ-дорилар ҳам бор. Воқеа жойидан интернетда эълон қилинган видеолавҳаларда шикастланган ҳарбий машина ёнида ҳарбий кийимдаги беш нафар кавказлик эркак жасади акс этган. Видеонинг ҳақиқийлиги ҳали тасдиқланмаган.
"Вагнер" ХҲК (ҳозирги "Африка корпуси") собиқ жангчилари июль ойида Мали-Жазоир чегараси яқинида жангарилар билан тўқнашувда ҳам жиддий йўқотишларга учраган эди.
Reuters агентлигининг маҳаллий манбалари ёлланма аскарлар ўлимини тасдиқлади. Мали армияси вакилларидан бири етти кишининг жасадини кўрганини айтган. Икки маҳаллий расмий "Вагнер" гуруҳининг беш нафар ёлланма аскари ҳалок бўлганини хабар қилди.
Минтақадаги можаро ва хавфсизлик бўйича эксперт Reuters агентлигига ҳужумни "Ал-Қоида"га алоқадор "Катиба Масина" амалга оширганини маълум қилган. Ҳалок бўлган руслар "Африка корпуси" жангчилари бўлиб, Африкадаги "Вагнер" ХҲК контингенти 2023 йил август ойида самолёт ҳалокати натижасида унинг раҳбари Евгений Пригожин вафотидан кейин қайта ташкил этилган янги бўлинма ҳисобланади.
Мавзуга алоқадор
-
Россияда миграция ва такси хизматлари соҳасини тартибга солишга қаратилган қонунчилик талаблари кучайтирилиши ортидан ҳайдовчи етишмаслиги кучайиб бормоқда. Йил охирига келиб 130 минг нафар такси ҳайдовчиси керак бўлади. Ҳайдовчилар етишмовчилиги такси нархларининг “ўнлаб фоизга” ошишига сабаб бўлиши кутилмоқда.
-
Эрон президенти мамлакатда аёлларнинг нафақат сочлари, балки билак ва бўйинларини ҳам очиб юришни тақиқловчи қонунни имзолаш арафасида. Қоидабузарлар ва янги қонунни танқид қилганлар 155 еврогача жаримага тортилади. Бу ҳақда хабар бермаган таксичи ёки турар жой мажмуалари раҳбарлари янада кўпроқ миқдорда жарима тўлашлари мумкин.
